Friday, July 6, 2007

Huau Huau leh Mizoram

Entertainment, mipui lawm zawng leh ‘hunawl hnawhkhahna tur’ hlimhlawp thil hi thil tul lo tawp a ni hauh lo. Mihring hian hnathawh ngawt ngawtte, ngaihtuah ngut ngutte, chhungkaw tana hun nei hlek lova hnathawh vak vak hian tisa leh thlarau nunah harsatna a thlen thei a ni. Tunlai khawvel in tlansiakna hautak zetah hian a thim/a/vat thlu lova hnathawk an tam tawh hle a. Thenkhat chu an chhungkuain a tuar a, thenkhat an hriselnain, thenkhat dang leh chu rilru buai hial an neih phah bawk thin. Khawvel ram chakang zawkah chuan hetiang harsatna nei hi an tam ta hle tawh a. An mahni kaihruaina tur lehkhabute pawh siam a ni ta zut zut hial a. Hunawl leh intihhlimna hun nei turin an fuih ta mawlh mawlh zawk a ni. Sum dawnna hmunpui (corporate) a thawkte tan pawh intihhlimna hun siam sak te, taksa sawizawihna turin instructor hial an ruai ta mek a ni.

Tichuan, ram changkang zawkah te chuan hunawl hnawhkhahna turin park-te, cinema hall-te, concert, playground-te leh hmun nuam deuh leh hmanlai hmun hmingthang te chu mawihnai zawkin an cheimawi sauh sauh a. Chung hmang chuan sum pawh nasa taka siamchhuah theih a nih avangin tourism department-te chu nasa takin an thuam thin a ni. Mipui lawm zawnga siamchhuahte chu mipui zingah hralh a kal tak em avang chuan chumi siamchhuahna hrang hrang a piangchhuak ta chur chur a. Chung zingah chuan Television company, film company amite chu pawisa rut hnem ber ber an ni ta a ni.

Sum dawngtuin an sumdawn hlawk theih nan heng ho hi an rawn tanpui bawk a. Advertisement hmangin mipui min zial at an tum a. Cell Phone fak mawi nan Shahruk Khan chu hman a ni. A tak ramah chuan Shahruk khana khan kha cell phone awmzia kha a hre lo tawp mai. Kha cell phone siamtu engineer leh technician ten an siam chin bak a danglam phah lo hrim hrim. Mahse, mipui chu ShahRuk khana hmang chuan zial at an ni tawh a. Shahruk khana cell phone ngei chu kan lei sup sup tawh mai a ni. Hei hi tunlai khawvel awmzia a ni. Kawng engkimah hian mahni hlawkna turin midang zialat vek tumna khawvelah kan cheng mek a ni. Mi tak te, mi dik zawkte, mi tangkai tak tak te, midang te hmangaihna tak tak neitu te hian mi lawm an hlawh ngai ta lo. He khawvelah hian kalhkimlo takin Mizo-te pawh kan zuanglut mek a ni.

Ram dang mite ang hian hnathawh nasat avang rilru hah leh hnathawh nasat avanga taksain a tuar phah sawi tur hi kan la tlem hlein a rinawm. Mahse, huau huau leh hlimhlawp thil lam engkim erawh kan ramah thlen tir vek kan tum thung a. Changkang kan tehna lian tak pawh a ni chho mek a ni. Thluk chiang hauh lovin, mipui nawlpui ten kan bawh huk huk a. Naupang deuh atanga a tar a zurin nuam chem chem lamah an tlan vek tawh mai. Chu nuam chem chem zawng tur chuan kan thalaite pawh tlan kan inzirtir a. Kohhrante pawhin Krismas kan lawm that theih loh dawn ai chuan school session kalphung thlak mai kan duh a. Hunawl hnawhkhahna tura duanchhuah Entertainment khawvel-ah chuan tu pawh mai chu kan tawngtawpaw inliluh bawrh bawrh a. Kan ram than len theihna turte, kan thlarau nun chawm theihna tur thutha te chu sir lamah kan pet sawn mek si a ni. Mizoram thanlen theihna tur kawngah mi beidawng an pung tial tial si a ni.


IDOL HRI

Mizo thalaite hian tu emaw entawn tlak, ngaihsan tlak kan mamawh a ni. Chung kan mi zawnte chu rualute zingah an vang tial tial a. Chu kan zawn tak chu tu emaw ten an ngaihdanin entertainment huang chhungah min rawn duan chhuah sak ta a. A hming atan idol leh icon min vuah sak a. Heng kan idol te hi nakinah Chief minister atan te, Minister atan te kan duh leh si angem? Mizoram pum dengchhhuak hat tham Youth Idol, Youth Icon, Look Alike kan huaihawt a, hmachhawp atan Skylink-Talent Hunt, LPS, Zonet Mizo idol, Lelte- Mizoram Super Idol kan tintuah leh mek a ni. Idol ringawt pawh sawm chuang kan awm dawn tawh ni awm a ni. Kan thalaite chu a tak ram ni lo, a lem nun kan zir tir a. Look alike kan ti a, tu lem emaw khawthlang vunvar lem thlengin kan chang thiam khawp mai. Lemchan kan thiam ang huin a tak rama thawkthei tura inbuatsaihna erawh a tlem si a ni.

Israel fate milem Pathian an biaktur an siam chawp ang khan, kan siamchhuah Youth Icon/idol-te leh super model te chu vantlangin kan buaipui rawn luih luih a. A khaw nawtin parthi nen kan lo hmuak luih luih a. Lawmpuina leh chawimawina chikim kan dawn tir a. Hetih lai hian thawhrimna nasa tak avanga thalai hlawhtling MIZO thalai ICON dik tak nia ka ngaih ve te, Muanpuii Saiawi IFS leh Nl Rinteii te hi an veng ten an lo hmuak ve em le?

Phuahchawp Idol, Icon, super model te tan inhmun leh lo ram kan pe a, thenkhatin sorkar hna kan lo pe ngawt bawk a. Mizoram mi ni tawh sa reng chungin citizenship kan lo inpe vel thul.A nih leh Mizoram siamthatna dik tak tur zirlai titha te hi inhmun kan pe tawh em? Khawvel puma inphochhuak pha, India rama hming lang pha te hi inhmun kan pe tawh em?

Heng idol/icon/talent hunt-te hi a tha e. Mi harsate zawk leh thingtlang mi te tan pawh inphochhuahna tur kawng tha tak a ni ang. Mahse, kan ti lutuk em? Heng thalaite hian an kal zelna atan kawng a kawhhmuh tluantling chiah em tih erawh i ngaihtuah ve ang u? A khaw nawt a buaipui huk huk tur ber em ni? Kan khawtlang mamawh ngawih ngaiwh ngaihtuah ho tur hian zan khat pawh rilru kan seng tlang thei si lo a ni. Patling thankin pui pui lo phusa viau thinte hi i inngaihtuah ang u. Youth Icon lawmpui nana Rs sing chuang rawn vawm tun tun ho khan BANK ah pawisa ba Rs nuai engzat nge in neih kha? Chuti chung chuan vantlang hmaah in la rawn inla milian vel a ni lawm ni?


Mahni fanu zuar

Tunlai Mizo khawtlanga kan insawngbawl dan hi chik cheuh cheuh ila, ler kan inzirtir tel deuh a ang ka ti thin. Nu leh pa zingah pawh mahni fanu zuar hi kan tam lutuk. Nu thenkhat mahni fanu te sex symbol a siamchhuah kan tum a ni ber tawh mai. Mipui mimir pawhin changkang kan tih zawng tak pawh a ni. Nu leh pa tam takte hian kan fanute hi mihura siamchhuah hi kan tum a ni? Chanchinbu mi pakhat chuan ti hian min hrilh a, “nu thenkhat chuan an fanu te thla hi lo laksak teh tiin min lo ngen teh ngawt a. A hnu lawkah hian engtik nge thlalak kha chanchinbuah a lo lan dawn” an la ti zui bawk nia a ti a ni. Hei mai a ni lo, kan chanchinbu Magazine lar deuh ho Cover atan chuan Mizo nulate chuan an mahni thlalak ngei chu an pe lut zut zut a, chanchinbu enkawltu pakhat chuan thenkhat chu “a nasa lutuk a, kan ti ngam lo zawk” a ti a ni. Hetiang hian mahni fanu te chu thawmhnaw themhlem tak tak nena chanchinbu kawma tarlan a lar tir sum haichhuah hi kan pawisa lem lo. Nawrhchizuar ten hmun leh hmunah an taksa an hralh a, heng Magazine cover a thawmhnaw themhlet zet nena taksa pholang thinte kawngdangin an hralh tho lo em ni? Nawrchizuarna ai hian enge a danglam na? Nu leh pa te hi inenfiah deuh a hun a ni.

Lar chak huam huamna khawvel

Tunlai Mizote hi lar chak huam huamna khawvelah kan cheng a, kawng dik tak atanga hlawhchhuah ai chuan kawng awlsam lam a tlan kan inzirtir mek bawk a. Hlawhtlin leh lar kan tum danah pawh pawisak kan nei map tawh lo thung si a ni. Entertainment atanga mi langsar chu mi hlawhtling berah kan chhuah a. Theihtawpin kan bawlphuan vak vak a. Kan thalai sukthlek hi a hruai khawlo mai dawn alawm le? Entertainment hmang hian Mizoram hi kan din thar thei chiah ang maw? Dangdai nih chak, miin an ngaisang dawn nia hria, fiamthu hmanga ram develop theih ring pawh kan chanchanchi bu lar ber ber zingah pawh an awm a ni. Fiamthu hmanga insawngbawl khawvel ram ding chhuak tawh sawi tur an awm chiah em?

Heng thil kan buaipui lutuk avangin thalai zingah engmah ni silo, lar chak an pung tam tial tial a. Tuai nihna ringawt te pawh eizawnna a ni ngawt tawh mai. Kan milar sa te pawh hian kut dawh state-a awm an nih an hre tawh lova, bus chuan an zak a, kalna apiangah VIP treatment an phut vek tawh mai. A nih leh ka milar te hian ram dang angin sorkar hnenah engzat nge TAX an pek? Nakinah chuan ramdang ang hian an tanna tur Jail nuam bik te hi kan la duang ve mai lovang maw? Khawvel ram zauzawk kan tawngtaw paw entawn ve ngawt ho te hi chu an intodelh bakah central sorkar atanga kutdawh ve hauh lo an ni. Chung rama celebrity-te ziarang zawng zawng zoram kutdawh celebrity-te ho hian an lo entawn duak duak hi chu hriat hmaih an nei a ni. Kutdawh an nih zia hi hre ve mawlh teh se.

Tunlai kan khawtlang kalphung hi chik cheuh cheuh ila, bollywood star ho ang mai a, tangkaina tak tak nei lo, khawtlang sum eitla duaktu hi kan siam chhuak palh ange. An larna hmang tangkaiin thuneihna pumhnawm tumin politics an awn ni hial a thleng palh ange. State pawn thawnchhuah chur chur tlak hi tharchhuak thin ila, chuan a zia deuh tur. Mahse, kan thil siamchhuah hian India hmarchhak dai a pel hleithei si lo a ni. Heti anih chuan thenkhat ten an Mizo pui hnena sum an khawnkhawmna hmanrua mai a ni. Hei hi mipui ten i hre mawlh ang u. Kan hriattur pawimawh tak chu, thangthar tu emaw promote hmachhuanin tu emaw chuan heng thil hi an siam chhuak zel dawn. Mahse, heng hote hian No.1 an rawn tinzawn ber chu i pawisa bag chiah kha a ni. Hemi thleng thei tur hian technology hian atan pui miau a lawm. A ti tur chin hian ti mai rawh se, a mipui nawlpuiin kan buaipui lutuk hi chu i inenfiah deuh ang u.

Sexual Politics

Kan entertainment hian sexual content a kengtel nasa em em tawh. Kan media hmelah hian chiang takin a lang mek a ni. Hemi tanpui tur tawkin technology kan hip lut ve bawk si. Chanchinbu-ah sex rawngkai reng reng leh a chanchinbu kawma hetiang (errotic) Sex tih tawngkam a awm hrim hrim chuan hralh a kal duak duak thin niin thian pakhat chuan min hrilh. Chung chu thalai ten an lawm viau a nih chuan an hriatthiam theih e. Mahse, sum enkawltu leh hnathawktu tam ber chu nu leh pa hi chanchinbu lei tu te sukthlek mawlh mai hi ngaihtuah tul chu a ni. Nu leh pa tamtak te hian mahni fate thanchhohna tura thil tangkai aia chuan heng chanchinbu hi an lei thin zawk tih a lang chiang hle a ni. A chhanchu, thalai ang bawkin kan nun hi a hurherh a, sex thil engemaw mai mai hi thil tangkai leh thalai thanchhohna ai chuan kan tuipui zawk miau a ni. Chhungrila kan nun pawlawh zia pawh alang chiang hle a ni. Kan naupangte tan han enge zir tur kan hnuchhiah le?

Kan chanchinbu tamtak ho khi ram leh hnam tana tangkai tur developmental issue lam buaipui a bul tan an ni fur vek a, mahse an hlawhchham vek a ni. Enga ti nge? Mipui ten entertainment thu ho mai mai lo chu an chhiar duh lova, chanchinbu hralh theih a ni si lo a ni. Chu vang chuan chanchinbu mi ho chuan mipui lawmzawng, siamchhuah an zir ta char char a ni. Mipui sukthlek chuan kan chanchinbu mi ho chu kan awk bet a, ram leh hnam tan tangkai takin hna an thawk thei lo a ni. Hetiang khawvela atang hian than len kan inbeisei cheu em ni?

Thingtlang mite Bumna

Heng khawpui atanga hlimhlawp thil kan duanchhuahte chu thingtlang lamah an darh zel a, an dinhmun chhiat zia ngaihtuahna chang hre hlek lovin kan khawpui ziarang chu an lo hip ve zawih zawih bawk a. An mamawh zawk tur thil reng an rilruah a leng tawh lo. Khawpui nula mawngtam lang lek lek te hmang chuan thingtlang pa ho chu zialatin an awm a. Ngaihtuahna fim an hmang thei tawh lova, politician ten vote zawn nan zaithiam an pun a, vawi hnih khat an zaitir a. Thingtlang pa rilru zawng zawng chu a tui zova, bumna thangah bawk an awk leh nge nge thin a ni. Heng kan entertaiment sawngbawl thin te hi thingtlang mite awpbehna hmanrua mai a ni lo maw? Kna entertainment ziarangah hian thingtlang ziarang reng a lang si lo.

Kan entawn mek ram dangte din hmun:

India ram khawpui thenkhat Bangalore, Pune, Chennai, Delhi, Mumbai-ah te khawvel hriattham milar thenkhat te’n concert an nei fo thin a. Hengte hi mizo thalaite’n kan lo awt ve deuh a nih paw’n a hriatthiamawm lutuk tlat mai. Amaherawhchu, heng khawpui neitu state-te hian sum leh paiah harsatna an nei ngai meuh lovin peace bonus an mawmawh ve kher hek lo. Sorkarlaipui atangin sum an mamawh hran tawh lo mai ni lovin, sum tam tawk central-ah an chhunglut ruih ruih thei zawk a ni. Hei mai a la ni lo, heng state kan sawi te hian India ram mai ni lo, khawvel pum huap Company/Corporation-te awmna hmun an ni. Enge maw hun pawimawh bikah chuan sum tam tawk, nuai bi mai nilo, vaibelchhe tel an vawmkhawm zung zung thei thin a ni. Mizorama kan dinhmun erawh sawi tam lovin, kan hre vek mai. Kan state sawrkar a intodelh lova; sum virvel siam thei tur company emaw, sawitham pakhat em pawh kan la nei lo a ni. Hetiang concert lian tham emaw thleng thei tura mamawh bulpui; infrastructure (power & Electricity, hotel lian, hall emaw auditorium emaw…) kan tlachham rih si. Vunvar ho ngei chu kan rama kan pawtlut rum rum a. A chhuanawm khawp mai. Mahse, hetianga Aizawl vela hlim zeta kan lo lam luih lai lai hian Mizoram thingtlang khua tam takte chu retheih lutuk avangin an rum mek ve thung a ni tih te hi i theihnghilh lo vang u.


Khawnge kan ram kalphung siam len theihna tur hi? Heng entertainment hian India hmarchhak dai pawh a pel zo em ni? State pawn atangin sum kan lakluh phah em? Tute nge hlawkpui a, tute pocket money bag nge phai duak duak? Enga tinge, lehkhathiam deuhte, sorkar hnathawk lian deuhte, pastor nupui-te emaw minister-te emaw thlenga heng thil hi kan buaipui khuk chuk mai le? A buaipui awm tawk hian buaipui mai se a tha lovem ni?

Heng entertainment hi hunawl hnahkhahna tur chauha duan a ni. Hna dang leh thil dang tihtur tibuai a hman hi sawi mawi tum ngial mah ila, a fuh lo tih hi chhanna tawi ber a ni. Heng entertainment a hlawkna teltu chu mi tlem an ni. A buaipui tur awm tawk hian buaipui mai rawh se. Tu pawh maiin, kan tisa leh thlarau ram thleng a nghawng a, khawhar in, office chhungah, hnathawhna hmun apiangah kan sep luih luih mai hi ngaihtuah tham a ni. Office atangin patling meuhin pawisa hekin SMS kan thawn phah ang tak chur chur a. Kan minister-te pawh chuan mipui laka tlaktlum loh hlauin pawisa an la rawn vawm tak tun tun a. Thalai deuh ten an buaipui a nih chuan a hriatthiam awm e. Mahse, puitling ber ber, ngaihtuahna fim hmang thei chin in kan lo buaipui lutuk hi chu ngaihtuah tham a ni.

Hawh teh u, Mizo thalaite u! i ngaihtuah chiang teh ang u. Tun dinhmun atan kan hmanhmawh dan hi a kim lo deuh em ni le? Kan state pachhe lutuk hi, i dawm kang hmasa ang u. Thalaite’n kan that lai leh hlimlai nite hi a mawihnai zawnga kan chen hi a tha e. kan ram leh hnam ngaihtuah chunga hlimhlawp thil kan phak tawk leh tlin tawk a kan chen ve hi a tha e. Amaherawhchu, kan state dinhmun pachhiat zia mawlh mai hi i theihnghilh lo teh ang u. Nawmsak hmasak i tum lovin nakin hun kan thlir thiam a hun takzet. Kan state pachhe zet mai hi chawmthau hmasa ila, nakinah a hausakna kan la chen ho dawn nia. Kan state hi kan vulhlen takzet hnu ah ngei concert turu tak tak mai bakah, Sport lama inelna turu ber ber kan ram ngeiah hian kan la thlir ho dawn nia. Tun dinhmun leh thangthar zel atan hian kan mamawh hmasak thilte, kan tihtur hmasate ngaihtuah chungin zelin tan i la hmasa phawt teh ang u.
Notes: Photo thenkhat (Look Alike) hi www.lawrkhawm.com (zonet look alike posted by J)http://lawrkhawm.com/story.php?id=261 atanga lakchhawn a ni e.

10 comments:

Anonymous said...

Nice dispatch and this enter helped me alot in my college assignement. Thanks you on your information.

Anonymous said...

I like the valuable info you provide in your articles.
I will bookmark your blog and check again here frequently.
I'm quite certain I will learn plenty of new stuff right here! Best of luck for the next!

Also visit my blog post libre

Anonymous said...

Good day! I know this is kind of off topic but I was wondering if you knew where I could get a captcha plugin for my
comment form? I'm using the same blog platform as yours and I'm having
trouble finding one? Thanks a lot!

my web-site; binary options

Anonymous said...

Hey there! I just wanted to ask if you ever have any problems with hackers?
My last blog (wordpress) was hacked and I ended up losing a few
months of hard work due to no data backup. Do you have any methods to stop
hackers?

Here is my site: perda de peso

Anonymous said...

Hi it's me, I am also visiting this site daily, this site is actually fastidious and the people are genuinely sharing pleasant thoughts.

Here is my website - des

Anonymous said...

I believe everything published made a bunch of sense. However,
what about this? what if you wrote a catchier title? I mean, I don't wish to tell you how to run your blog, however suppose you added a post title that makes people want more? I mean "Huau Huau leh Mizoram" is a little vanilla. You should peek at Yahoo's front page and note how they create post titles to grab viewers to open the links.
You might add a video or a related pic or two to get readers interested
about what you've written. Just my opinion, it could make your posts a little bit more interesting.

my web site: des

Anonymous said...

I'm curious to find out what blog platform you happen to be using? I'm experiencing some small security
issues with my latest blog and I would like to find something more secure.
Do you have any suggestions?

Also visit my web site - www.hsdgfuyewertwe.com

Anonymous said...

I must thank you for the efforts you have put in penning
this website. I'm hoping to see the same high-grade content by you later on as well. In truth, your creative writing abilities has encouraged me to get my own website now ;)

Feel free to surf to my blog post ... face

Anonymous said...

Thanks for one's marvelous posting! I seriously enjoyed reading it, you are a great author. I will be sure to bookmark your blog and will eventually come back someday. I want to encourage continue your great writing, have a nice day!

Check out my website ... hsdgfuyewertwe.com

Anonymous said...

Thanks designed for sharing such a good thought, piece of
writing is fastidious, thats why i have read it entirely

My website: website