Tum Thing (palm tree)

Mizo ten tum thing kan tih thin hi palm tree family zinga mi an nih hmel (ka hriat sual palh loh chuan). Israel ramah pawh a tam hle niin a lang. Bible-ah pawh Tum thing sawina hmuh tur a awm a. Isua lo hmuah nan pawh tum kau an hmang a ni. Mizoram Kohhrante pawhin Tumkau ni (palm sunday) kan lo hmang thin a ni.

Tum thing hi chi hrang hrang a awm ve a. Thenkhat chuan tek in a deng duh bik tiin an sawi thin a. Chuvang chuan, mahni in bulah awm atan an duh vak lo. Motor kawngpui dung sira ding atan hian a mawi hlein ka hria. Khawvel ram tamtakah chuan hmunhma cheina hmanraw tha tak a ni.

Photo kan hmuh hi tum thing chikhat a ni a. A par hi hetiang hian a awm thin a. A par awmnaah hian a rah a awm a. A rah chu kuva rah nen a inang hle a. Kan tet lai chuan, a rah hi lungah kan nawt fai a, kan thial thin a. Kuva rah ai mah hian a chang zawkin ka hria. Hman deuh khan vai ho hian a rah hi an chhar nasa mai a, "enga tan nge an tih ang aw" tih ka ngaihtuah mai mai a. An ei dawn nge, a chi atan an dahtha dawn tih lah ka hre si lo.